Levotsetirizin - tsetirizinning R-enantiomeri, gistaminning raqobatbardosh antagonistlari guruhiga kiradi, N1-gistamin retseptorlarini (N1-GR) bloklaydi, N1-GR ga yuqori darajada selektivlikka ega. Levotsetirizin allergik reaksiyalarning gistaminga bog‘liq bosqichiga ta’sir ko‘rsatadi, eotaksinlarni ingibitsiya qiladi, ular eozinofillarning transendotelial migratsiyasiga yordam beradi, qon tomir hujayra adgeziyasining 1-molekulasining ekspressiyasini bloklaydi, eozinofillarning migratsiyasini kamaytiradi, tomir o‘tkazuvchanligini kamaytiradi, yallig‘lanish mediatorlarining ajralishini cheklaydi. Kuchli antiallergik ta’sirga ega, allergik reaksiya rivojlanishini oldini oladi va uning kechishini yengillashtiradi, antiekssudativ, qichishishga qarshi ta’sirga ega, deyarli antixolinergik va antiserotonin ta’sir ko‘rsatmaydi. Terapevtik dozalarda deyarli sedativ ta’sir ko‘rsatmaydi. Farmakokinetika Vintset® og‘iz orqali qabul qilingandan so‘ng tez va intensiv so‘riladi. Qon plazmasida maksimal konsentratsiyaga dozadan keyin 0,9 soatda erishiladi. Preparatning ta’siri bir martalik doza qabul qilingandan so‘ng 50% bemorlarda 20 daqiqada, 1 soatda - 95% da boshlanadi va 24 soat davom etadi. Levotsetirizin qon plazmasi oqsillari bilan 90% bog‘lanadi. Biologik o‘zlashtirilishi 100% ga yetadi. Jigar orqali oz miqdorda metabolizmga uchraydi. Yarim chiqarilish davri 7-10 soat.

Levotsetirizin yarim chiqarilish davri teofillin bilan birga qo‘llanganda biroz oshishi mumkin. Levotsetirizinni etil spirti va markaziy asab tizimini susaytiruvchi dori vositalari bilan birga qo‘llash tavsiya etilmaydi.

Tavsiya etilgan sutkalik dozani oshirib yuborish mumkin emas. Bemorni levotsetirizin bilan davolash vaqtida spirtli ichimliklar iste’mol qilish tavsiya etilmasligi haqida ogohlantirish lozim. Homiladorlik va laktatsiya davri Homilador ayollarda levotsetirizinni qo‘llash bo‘yicha yetarli klinik ma’lumotlar yo‘q, shuning uchun preparatni homiladorlikda qo‘llash mumkin emas. Levotsetirizin ko‘krak suti bilan ajraladi. Levotsetirizinni qo‘llash zarur bo‘lsa, emizishni to‘xtatish kerak. Avtomobil haydash va potensial xavfli mexanizmlarni boshqarish qobiliyatiga ta’siri Levotsetirizinni tavsiya etilgan dozada qo‘llashda avtomobil haydash va mexanizmlar bilan ishlash qobiliyati o‘zgarmaydi. Shunga qaramay, davolash davrida nojo‘ya reaksiyalar (uyquchanlik, bosh aylanishi) rivojlanishi mumkinligini hisobga olib, diqqatni jamlash va psixomotor reaksiyalar tezligini talab qiladigan potensial xavfli faoliyat turlari bilan shug‘ullanishda ehtiyotkorlikka rioya qilish zarur. Preparatni bolalar ololmaydigan joyda saqlash va yaroqlilik muddati tugaganidan keyin ishlatmaslik kerak.

Simptomlar: uyquchanlik (katta yoshdagilarda), qo‘zg‘aluvchanlik va bezovtalik, keyin uyquchanlik (bolalarda). Davolash: preparat qabul qilingandan so‘ng darhol oshqozonni yuvish yoki sun’iy qusishni chaqirish kerak. Faollashtirilgan ko‘mir buyurish, simptomatik va qo‘llab-quvvatlovchi terapiya o‘tkazish tavsiya etiladi. Maxsus antidot yo‘q. Gemodializ samarali emas.