Nurofen® bolalar uchun 3 oylik hayotdan 12 yoshgacha bo‘lgan bolalarda o‘tkir respirator kasalliklar, gripp, bolalar infeksiyalari, emlashdan keyingi reaksiyalar va tana haroratining ko‘tarilishi bilan kechadigan boshqa infeksion-yallig‘lanish kasalliklarida isitmani tushiruvchi vosita sifatida qo‘llaniladi. Preparat og‘riq sindromi yengil yoki o‘rtacha darajadagi bo‘lsa, shu jumladan bosh va tish og‘rig‘i, migren, nevralgiya, quloq va tomoq og‘rig‘i, cho‘zilishlar va boshqa turdagi og‘riqlarda og‘riqni qoldiruvchi vosita sifatida ishlatiladi. Shifokor ushbu preparatni boshqa ko‘rsatmalarda ham tavsiya qilishi mumkin (bunday hollarda shifokorning dozalash va qo‘llash sxemasi bo‘yicha tavsiyalariga rioya qiling). 

 Preparat nosteroid yallig‘lanishga qarshi preparatlar (NYaQP) guruhiga kiradi. Og‘riqqa qarshi yo‘naltirilgan, isitmani tushiruvchi va yallig‘lanishga qarshi ta’sir ko‘rsatadi. COX1 va COX2 ni tanlamasdan bloklaydi. Ibuprofenning ta’sir mexanizmi prostaglandinlar – og‘riq, yallig‘lanish va gipertermik reaksiya mediatorlari sintezini tormozlash bilan bog‘liq. Preparatning ta’siri 8 soat davom etadi. 

 Nurofen® bolalar uchun antikoagulyantlar bilan bir vaqtda qo‘llanilganda ularning ta’sirini kuchaytirishi mumkin. Nurofen® bolalar uchun digoksin, fenitoin, metotreksat, litiyning qon plazmasidagi konsentratsiyasini ushbu preparatlar bilan birga qo‘llanganda oshiradi. Nurofen® bolalar uchun diuretiklar va antigipertenziv vositalar bilan birga qo‘llanganda ularning samaradorligini pasaytiradi. Mineralokortikosteroidlar va glyukokortikosteroidlarning nojo‘ya ta’sirlarini kuchaytiradi. 

 Nurofen® bolalar uchun diabet kasalligi bo‘lgan bolalarga qo‘llash mumkin, chunki preparat tarkibida shakar yo‘q. Bo‘yoq moddalarini o‘z ichiga olmaydi. Preparatni yaroqlilik muddati tugaganidan keyin qo‘llash mumkin emas va uni bolalar uchun yetib bo‘lmaydigan joyda saqlash kerak. Bolaga Nurofen® bolalar uchun berishdan oldin shifokor bilan maslahatlashish lozim, agar bola • boshqa og‘riq qoldiruvchi dori vositalarini qabul qilayotgan bo‘lsa; • anamnezida yara kasalligi, gastrit, yarali kolit, me’da-ichak qon ketishi bo‘lsa; • jigar va buyrak kasalliklari bo‘lsa; • H.pylori mavjud bo‘lsa; • bilvosita antikoagulyantlar (og‘iz orqali qabul qilinadigan, qon ivishini kamaytiruvchi preparatlar), arterial bosimni pasaytiruvchi preparatlar, glyukokortikosteroidlar, antiagregantlar, diuretiklar (siydik haydovchi preparatlar), litiy preparatlari, metotreksat qabul qilayotgan bo‘lsa; • bronxial astma, eshakemi kasalligidan aziyat cheksa. 

 Doza oshirib yuborish muammolari juda kam uchraydi, biroq agar siz tasodifan tavsiya etilgan dozani oshirib yuborgan bo‘lsangiz, darhol shifokorga murojaat qiling. Doza oshirib yuborish simptomlari: qorin og‘rig‘i, ko‘ngil aynishi, qusish, bosh og‘rig‘i, quloqda shovqin, metabolik atsidoz, koma, o‘tkir buyrak yetishmovchiligi, arterial bosimning pasayishi, bradikardiya, taxikardiya. Davolash: me’dani yuvish (faqat qabul qilingandan keyin bir soat ichida), faollashtirilgan ko‘mir, ishqoriy ichimlik, majburiy diurez, simptomatik terapiya.