Maxsus ko'rsatmalar
Maxsus toifali bemorlar.
Renin-angiotenzin-aldosteron tizimini ikki tomonlama blokadalash alişkiren saqlovchi dori vositalari yordamida.
Renin-angiotenzin-aldosteron tizimini ikki tomonlama blokadalash Ramizes va alişkiren preparatlarini birga qo‘llash orqali tavsiya etilmaydi, chunki bu arterial gipotenziya, giperkalemiya va buyrak funksiyasining o‘zgarishlari rivojlanish xavfini oshiradi.
Saxarli diabet yoki buyrak funksiyasi buzilgan (GFR < 60 ml/min) bemorlarda Ramizes va alişkiren preparatlarini birga qo‘llash kontrendikatsiya qilinadi.
Arterial gipotenziya rivojlanish xavfi yuqori bo‘lgan bemorlar.
Renin-angiotenzin-aldosteron tizimi faolligining sezilarli oshishi bo‘lgan bemorlar. Renin-angiotenzin-aldosteron tizimi faolligining sezilarli oshishi bo‘lgan bemorlarda, ayniqsa, ADF ingibitori yoki hamroh diuretik birinchi marta buyurilganda yoki dozasi birinchi marta oshirilganda, ADF ingibitsiyasi natijasida QDning to‘satdan sezilarli pasayishi va buyrak funksiyasining yomonlashuvi xavfi mavjud. Renin-angiotenzin-aldosteron tizimi faolligining sezilarli oshishi, tibbiy nazorat, shu jumladan doimiy QD nazoratini talab qilishi mumkin, masalan, quyidagi bemorlarda:
- og‘ir arterial gipertenziya bilan;
- dekompensatsiyalangan dimlangan yurak yetishmovchiligi bilan;
- chap qorincha qon oqimi kirishi yoki chiqishiga gemodinamik ahamiyatli to‘siq (masalan, aortal yoki mitral klapan stenozi) bilan;
- ikkinchi ishlovchi buyrak mavjudligida bir tomonlama buyrak arteriyasi stenozi bilan;
- suyuqlik yoki elektrolit yetishmovchiligi mavjud yoki rivojlanishi mumkin bo‘lgan (shu jumladan diuretik oluvchi) bemorlar;
- jigar sirrozi va/yoki assit bilan;
- keng ko‘lamli jarrohlik amaliyotlari o‘tkazilayotgan yoki arterial gipotenziya chaqiruvchi preparatlar bilan anesteziya vaqtida.
Odatda, davolashni boshlashdan oldin degidratatsiya, gipovolemiya yoki elektrolit yetishmovchiligini tuzatish tavsiya etiladi (biroq yurak yetishmovchiligi bo‘lgan bemorlarda bunday tuzatish choralarini hajm ortiqchaligi xavfi nuqtai nazaridan ehtiyotkorlik bilan ko‘rib chiqish kerak).
Jigar funksiyasi buzilgan bemorlarda Ramizes preparatiga javob kuchayishi yoki kamayishi mumkin. Bundan tashqari, og‘ir jigar sirrozi, shish va/yoki assit bilan kechayotgan bemorlarda renin-angiotenzin tizimi faolligi sezilarli darajada oshgan bo‘lishi mumkin; shuning uchun bunday bemorlarni davolashda alohida ehtiyotkorlik zarur.
Infarkt miokarddan keyingi o‘tkinchi yoki doimiy yurak yetishmovchiligi.
Arterial gipotenziya yuzaga kelganda yurak yoki miya ishemiyasi xavfi bo‘lgan bemorlar. Davolashning boshlang‘ich bosqichida alohida tibbiy nazorat talab qilinadi.
Keksalar. Qarang «Qo‘llash usuli va dozalari» bo‘limi.
Jarrohlik aralashuvi. Imkon qadar, angiotenzin aylantiruvchi ferment ingibitorlari, masalan, ramipril bilan davolashni jarrohlik aralashuvidan 1 kun oldin to‘xtatish kerak.
Buyrak funksiyasini nazorat qilish. Buyrak funksiyasini davolashdan oldin va davolash davomida baholash va dozasini moslashtirish kerak, ayniqsa davolashning birinchi haftalarida. Ayniqsa, buyrak funksiyasi buzilgan bemorlarda (qarang «Qo‘llash usuli va dozalari» bo‘limi) sinchkov nazorat zarur. Buyrak funksiyasining yomonlashuvi xavfi mavjud, ayniqsa dimlangan yurak yetishmovchiligi yoki buyrak ko‘chirib o‘tkazilgan bemorlarda.
Angionevrotik shish. ADF ingibitorlari, shu jumladan ramipril qabul qilgan bemorlarda angionevrotik shish kuzatilgan (qarang «Nojo‘ya reaksiyalar» bo‘limi). Angionevrotik shish rivojlangan taqdirda Ramizes preparatini qabul qilishni to‘xtatish kerak. Zudlik bilan shoshilinch terapiyani boshlash zarur. Bemor kamida 12-24 soat davomida nazorat ostida bo‘lishi kerak va simptomlar to‘liq yo‘qolgandan so‘ng chiqarilishi mumkin.
ADF ingibitorlari, shu jumladan Ramizes qabul qilgan bemorlarda ichak angionevrotik shishi holatlari kuzatilgan (qarang «Nojo‘ya reaksiyalar» bo‘limi). Bu bemorlar qorin og‘rig‘idan (ko‘ngil aynishi yoki qusish bilan yoki ularsiz) shikoyat qilgan.
Desensibilizatsiya vaqtida anafilaktik reaksiyalar. ADF ingibitorlari qo‘llanganda hasharot zahari va boshqa allergenlarga anafilaktik va anafilaktoid reaksiyalar ehtimoli va og‘irligi oshadi. Desensibilizatsiya o‘tkazishdan oldin Ramizes preparatini vaqtincha to‘xtatish kerak.
Giperkalemiya. ADF ingibitorlari, shu jumladan Ramizes preparatini qabul qilgan ayrim bemorlarda giperkalemiya rivojlanishi kuzatilgan. Giperkalemiya rivojlanish xavfi guruhiga buyrak yetishmovchiligi bo‘lgan bemorlar, 70 yoshdan oshgan bemorlar, nazorat qilinmaydigan saxarli diabeti bo‘lgan bemorlar, kaliy tuzlari, kaliy tejovchi diuretiklar, shuningdek, plazmada kaliy miqdorini oshiruvchi boshqa faol moddalarni qabul qilayotgan bemorlar yoki degidratatsiya, o‘tkir yurak dekompensatsiyasi, metabolik asidoz kabi holatlari bo‘lgan bemorlar kiradi. Agar ushbu preparatlarni birga qo‘llash maqsadga muvofiq deb hisoblansa, plazmada kaliy darajasini muntazam nazorat qilish tavsiya etiladi (qarang «Boshqa dori vositalari bilan o‘zaro ta’siri va boshqa o‘zaro ta’sir turlari» bo‘limi).
Neitropeniya/Agranulotsitoz. Neitropeniya/agranulotsitoz, shuningdek trombotsitopeniya va anemiya holatlari kamdan-kam kuzatilgan. Shuningdek, suyak iligi funksiyasining susayishi haqida xabar berilgan. Ehtimoliy leykopeniyani aniqlash maqsadida qonda leykotsitlar sonini nazorat qilish tavsiya etiladi. Nazoratni davolash boshida va buyrak funksiyasi buzilgan, hamroh kollagenoz (masalan, tizimli qizil volchanka yoki sklerodermiya) bo‘lgan yoki qon manzarasini o‘zgartirishi mumkin bo‘lgan boshqa dori vositalarini qabul qilayotgan bemorlarda tez-tez o‘tkazish maqsadga muvofiq (qarang «Boshqa dori vositalari bilan o‘zaro ta’siri va boshqa o‘zaro ta’sir turlari» va «Nojo‘ya reaksiyalar» bo‘limlari).
Etnik farqlar. ADF ingibitorlari negr irqiga mansub bemorlarda boshqa irqlarga nisbatan angionevrotik shishni ko‘proq chaqiradi. Boshqa ADF ingibitorlari kabi, ramiprilning gipotenziya ta’siri negr irqiga mansub bemorlarda boshqa irqlarga nisbatan kamroq bo‘lishi mumkin. Bu, ehtimol, arterial gipertenziya bilan og‘rigan negr irqiga mansub bemorlarda past renin faolligi bilan kechuvchi arterial gipertenziya ko‘proq uchrashi bilan bog‘liq.
Yo‘tal. ADF ingibitorlari qo‘llanganda yo‘tal paydo bo‘lishi haqida xabar berilgan. Yo‘tal odatda nohosil, uzoq davom etuvchi va davolash to‘xtatilgandan so‘ng yo‘qoladi. Yo‘talni differensial diagnostika qilishda ADF ingibitorlari qo‘llanilishi natijasida yo‘tal paydo bo‘lishi mumkinligini yodda tutish kerak.
Preparat tarkibida laktoza mavjud, shuning uchun uni galaktozani kamdan-kam uchraydigan irsiy intoleransiyasi, laktaza yetishmovchiligi yoki glyukoza-galaktoza malabsorbsiyasi sindromi bo‘lgan bemorlarga buyurmaslik kerak.
Homiladorlik yoki emizish davrida qo‘llash
Homiladorlik. Ramizes preparatini homilador ayollar yoki homilador bo‘lishni rejalashtirayotgan ayollarga qo‘llash mumkin emas. Agar ushbu dori vositasi bilan davolash vaqtida homiladorlik tasdiqlansa, uni darhol to‘xtatish va homilador ayollarda qo‘llashga ruxsat etilgan boshqa dori vositasi bilan almashtirish kerak.
Emizish. Ramiprilni emizish davrida qo‘llash bo‘yicha ma’lumotlar yo‘qligi sababli, ushbu preparatni emizikli ayollarga buyurish tavsiya etilmaydi va emizish davrida qo‘llash xavfsizroq bo‘lgan boshqa dori vositalariga afzallik berish maqsadga muvofiq, ayniqsa yangi tug‘ilgan yoki muddatidan oldin tug‘ilgan chaqaloqlarni emizishda.
Avtotransport yoki boshqa mexanizmlarni boshqarishda reaksiya tezligiga ta’sir qilish qobiliyati
Ba’zi nojo‘ya ta’sirlar (masalan, QD pasayishining ayrim simptomlari, xususan bosh aylanishi) bemorning diqqatini jamlash va psixomotor reaksiyalar tezligiga salbiy ta’sir ko‘rsatishi mumkin, ayniqsa davolash boshida yoki boshqa preparatlardan o‘tishda. Birinchi doza yoki keyingi doza oshirilgandan so‘ng bir necha soat davomida avtotransport boshqarish yoki boshqa mexanizmlar bilan ishlash tavsiya etilmaydi.
Dorilar
Dorixona kosmetikasi
Ona va bola
Tibbiy mahsulotlar
Gigiena va parvarish
Vitaminlar va BFQ
Qo'shimcha mahsulotlar
