Budekton 200 mkg Har bir kapsula tarkibida faol modda budesonid 200 mkg; yordamchi modda laktoza monogidrat; kapsula tarkibi jelatin, temir oksidi qizil, titan dioksid. Budekton 400 mkg Har bir kapsula tarkibida faol modda budesonid 400 mkg; yordamchi modda laktoza monogidrat; kapsula tarkibi jelatin, temir oksidi qora, temir oksidi qizil, titan dioksid.

• glyukokortikosteroidlar bilan qo‘llab-quvvatlovchi davolashni talab qiladigan bronxial astma; • surunkali obstruktiv o‘pka kasalligi (SO‘OK).

• preparatning har qanday komponentiga yuqori sezuvchanlik; • faol tuberkulyoz shakli; • 6 yoshgacha bo‘lgan bolalar yoshi.

Budekton inhalatsion qo‘llash uchun mo‘ljallangan. Preparatni og‘iz orqali qabul qilish mumkin emas. Preparat inhalatsiya uchun kukun saqlovchi kapsulalardan iborat bo‘lib, faqatgina qadoq tarkibiga kiruvchi maxsus moslama yordamida qo‘llanilishi lozim. Kapsulaning buzilishi natijasida kichik qobiq bo‘lakchalari inhalatsiya vaqtida og‘iz yoki halqumga tushishi mumkin. Ushbu holatni minimal darajaga tushirish uchun kapsulani bir martadan ortiq teshmaslik kerak. Kapsulani blister qadoqdan bevosita qo‘llashdan oldin olish lozim. 1 preparat dozasiga (200 mkg yoki 400 mkg) 1 inhalatsiya to‘g‘ri keladi. Dozalar individual tarzda, kasallik og‘irligi va bemorning reaksiyasiga qarab tanlanadi. Budektonning odatdagi tavsiya etiladigan dozasi sutkada 200-1600 mkg ni tashkil etadi. Bemor holati barqarorlashgandan so‘ng, eng past samarali doza bo‘lgan qo‘llab-quvvatlovchi doza tanlanishi kerak. Kattalar va 12 yoshdan katta bolalarga 200 mkg budesonid kuniga 1-2 marta. Maksimal sutkalik doza – 1600 mkg budesonid. 6 yoshdan 12 yoshgacha bo‘lgan bolalarga 200 mkg budesonid kuniga 1-2 marta. Maksimal sutkalik doza – 800 mkg budesonid, bir necha qabulga bo‘linadi. Preparatni faqat kattalar nazorati ostida qabul qilish lozim. Preparat yallig‘lanishga qarshi ta’sir ko‘rsatadi, shuning uchun uni bemor holati yaxshilangandan keyin ham doimiy va muntazam qo‘llash kerak. Odatda, Budekton uzoq muddatli davolash kursi uchun buyuriladi, kurs individual tarzda belgilanadi. Ba’zan bronxlarda ko‘p miqdorda sekret bo‘lishi sababli preparatning yallig‘lanish zonasiga yetib borishi qiyinlashishi mumkin. Bunday hollarda oldindan og‘iz orqali qabul qilinadigan GKSlardan qisqa kurs bilan davolash tavsiya etiladi. Inhalatsiyalar og‘iz orqali qabul qilinadigan GKSlardan doza asta-sekin kamaytirilgandan so‘ng o‘tkaziladi. Agar bemor og‘iz orqali qabul qilinadigan GKSlardan foydalansa, uni Budekton preparati bilan davolashga kasallikning barqaror bosqichida o‘tkaziladi. GKSlardan voz kechish asta-sekin amalga oshiriladi. 7-10 kun davomida GKSlardan og‘iz orqali tanlangan dozada va Budekton preparati bilan yuqori dozada (sutkada 1600 mkg gacha) inhalatsiyalar birga qo‘llanadi. So‘ngra GKSlardan doza har 1-2 haftada 2,5 mg prednizolon miqdorida asta-sekin kamaytiriladi. Nafas yo‘llarining o‘tkir respirator kasalliklari vaqtida klinik simptomatika kuchayganda antibiotikoterapiya buyurish kerak. Shuningdek, Budekton preparati dozasini tuzatish yoki og‘iz orqali GKSlardan buyurish zarur bo‘lishi mumkin. Surunkali obstruktiv o‘pka kasalligida budesonidning tavsiya etiladigan dozasi 400 mkg kuniga 2 marta. Budekton bilan davolashning dastlabki 3-6 oyi davomida ijobiy javob olgan bemorlarga preparat uzoq muddat davomida qo‘llanadi. Inhalatsiyalarni o‘tkazish qoidalari Bolalar va o‘smirlarda Budekton inhalatsiyalari kattalar nazorati ostida o‘tkazilishi kerak. Bolaning inhalatsiya texnikasini to‘g‘ri bajarayotganiga ishonch hosil qilish zarur. Budesonid inhalatsiyasidan so‘ng og‘iz bo‘shlig‘ini suv bilan chayish og‘iz va halqum shilliq qavatining tirnashini oldini olishi, shuningdek, tizimli nojo‘ya hodisalar rivojlanish xavfini kamaytirishi mumkin. Inhalatsiya moslamasidan foydalanish bo‘yicha yo‘riqnoma 1. Inhalatsiya moslamasidan qopqog‘ini olib tashlang. 2. Inhalatsiya moslamasini tagidan mahkam ushlab, og‘iz qismini strelka yo‘nalishida burang. 3. Kapsulani inhalatsiya moslamasining tagida joylashgan (kapsula shaklidagi) uyaga joylashtiring. Kapsulani blister qadoqdan inhalatsiya o‘tkazishdan bevosita oldin olish kerakligini yodda tuting. 4. Og‘iz qismini burab, inhalatsiya moslamasini yoping. 5. Moslamani qat’iy vertikal holatda ushlab, yon tomonlardagi qizil tugmalarni bir marta oxirigacha bosib, so‘ng ularni qo‘yib yuboring. Ushbu bosqichda kapsula teshilganda u buzilishi mumkin, natijada kichik qobiq bo‘lakchalari og‘iz yoki halqumga tushishi mumkin. Kapsula to‘liq buzilmasligi uchun quyidagilarga amal qilish kerak: kapsulani bir martadan ortiq teshmaslik; saqlash qoidalariga rioya qilish; kapsulani blisterdan faqat inhalatsiya o‘tkazishdan bevosita oldin olish. 6. To‘liq nafas chiqaring. 7. Og‘iz qismini og‘izga olib, boshni biroz orqaga egib, og‘iz qismini lablar bilan mahkam o‘rab, tez, bir maromda, maksimal chuqur nafas oling. Shu paytda bemor kapsulaning aylanishi va kukunning purkalishi natijasida hosil bo‘ladigan xos jarangdor tovushni eshitishi kerak. Agar xos tovush eshitilmasa, inhalatsiya moslamasini ochib, kapsula bilan nima bo‘lganini ko‘ring. Ehtimol, u uyada tiqilib qolgan bo‘lishi mumkin. Bunday holda kapsulani ehtiyotkorlik bilan olib tashlang. Hech qanday holatda kapsulani yon tugmalarni qayta bosish orqali bo‘shatishga urinish mumkin emas. 8. Nafas olayotganda xos tovush eshitilsa, nafasni imkon qadar uzoq ushlab turing. Shu paytda og‘iz qismini og‘izdan chiqarib oling. So‘ng nafas chiqaring. Moslamani ochib, kapsulada kukun qolgan-qolmaganini tekshiring. Agar kapsulada kukun qolgan bo‘lsa, 6-8-bandlarda ko‘rsatilgan harakatlarni takrorlang. 9. Inhalatsiya jarayoni tugagach, moslamani oching, bo‘sh kapsulani olib tashlang, og‘iz qismini yoping va moslamani qopqog‘i bilan yoping. Qolgan kukunlarni tozalash uchun og‘iz qismini va uyani quruq mato bilan artib oling. Shuningdek, yumshoq cho‘tkadan foydalanish mumkin.

Endokrin tizimi tomonidan kamdan-kam hollarda - buyrak usti bezlari po‘stlog‘i funksiyasining susayishi, Kushing sindromi, giperkortitsizm, bolalar va o‘smirlarda o‘sishning sekinlashuvi. Ko‘rish organi tomonidan kamdan-kam hollarda - katarakta, glaukoma. Allergik reaksiyalar kamdan-kam hollarda - gipersensitivlik reaksiyalari, toshma, eshakemi, angionevrotik shish, qichishish. Markaziy asab tizimi tomonidan kamdan-kam hollarda - noodatiy xatti-harakatlar, shu jumladan depressiya (bolalarda tasvirlangan). Suyak-mushak tizimi tomonidan suyak to‘qimasining mineral zichligining pasayishi. Nafas olish tizimi tomonidan tez-tez - yo‘tal; kamdan-kam hollarda - paradoksal bronxospazm, og‘iz bo‘shlig‘i va hiqildoq shilliq qavatining kandidozi, halqumning tirnash xususiyati, disfoniy, budesonid bilan davolash to‘xtatilgandan yoki preparat dozasini kamaytirgandan so‘ng yo‘qoladi.

Budesonid inhalatsion qo‘llash uchun mo‘ljallangan sintetik glyukokortikosteroid (GKS) bo‘lib, deyarli tizimli ta’sirga ega emas. Budesonid yallig‘lanishga qarshi, allergiyaga qarshi va immunodepressiv ta’sir ko‘rsatadi. Lipokortin ishlab chiqarilishini oshiradi, u fosfolipaza A2 ning ingibitori hisoblanadi, araxidon kislotasining ajralishini to‘xtatadi, araxidon kislotasi metabolizmi mahsulotlari – tsiklik endoperoksidlar va prostaglandinlar sintezini susaytiradi. Neytrofillarning chekka to‘planishini oldini oladi, yallig‘lanish ekssudatsiyasi va sitokinlar ishlab chiqarilishini kamaytiradi, makrofaglar migratsiyasini to‘xtatadi, infiltratsiya va granulyatsiya jarayonlarining ifodalanishini, xemotaksis substansiyasi hosil bo‘lishini kamaytiradi (bu «kech» allergik reaksiyalarda samaradorligini tushuntiradi); to‘qima hujayralaridan yallig‘lanish mediatorlari ajralishini to‘xtatadi (zudlik bilan allergik reaksiya). «Faol» β-adrenoretseptorlar sonini oshiradi, bemorning bronxodilatatorlarga javobini tiklaydi, ularni qo‘llash tez-tezligini kamaytirishga imkon beradi, bronxlar shilliq qavati shishishini, shilliq ishlab chiqarilishini, balg‘am hosil bo‘lishini kamaytiradi va nafas yo‘llari gipereaktivligini pasaytiradi. Mukotsiliyar transportni oshiradi. Preparatning bir dozasini inhalatsiya qilgandan so‘ng terapevtik ta’sir boshlanish vaqti bir necha soatni tashkil etadi. Maksimal terapevtik ta’sir terapiya boshlanganidan 1-2 hafta o‘tib erishiladi. Doimiy qo‘llashda bronxial astmali bemorlarda budesonid o‘pka to‘qimalarida surunkali yallig‘lanish darajasini kamaytiradi va shu tariqa o‘pka funksiyasini, bronxial astma kechishini yaxshilaydi, bronxlar gipereaktivligini pasaytiradi va kasallikning zo‘rayishini oldini oladi.

Qo‘llash bo‘yicha yo‘riqnomaga muvofiq davolashda Budekton preparati bilan o‘tkir dozani oshirib yuborish, uni bartaraf etish choralarini talab qiladigan holat, deyarli mumkin emas. Preparatning katta miqdorini bir martalik inhalatsiyasi gipotalamo-gipofizar-buyrak usti bezlari tizimi funksiyasining vaqtincha susayishiga olib kelishi mumkin, bu esa shoshilinch davolashni talab qilmaydi. Budesonid bilan dozani oshirib yuborishda davolash terapevtik ta’sirni saqlab turish uchun yetarli bo‘lgan dozada davom ettirilishi mumkin.

 Ingalatsion qabul qilish natijasida qon plazmasida juda past konsentratsiya hosil bo‘lishi sababli, boshqa dori vositalari bilan klinik jihatdan ahamiyatli o‘zaro ta’sir ehtimoli umuman past. Biroq, preparatni CYP3A4 ingibitorlari (masalan, itrakonazol, ketokonazol, ritonavir, nelfinavir, amiodaron, klaritromitsin) bilan birga qo‘llash budesonid metabolizmining pasayishiga va uning tizimli konsentratsiyasining oshishiga olib kelishi mumkin. Budesonidni CYP3A4 ingibitorlari bilan birga buyurishda buyrak usti bezlari po‘stlog‘i funksiyasini muntazam nazorat qilish va zarurat tug‘ilganda budesonid dozasini o‘zgartirish kerak. Budesonidni CYP3A4 induktorlarini (masalan, rifampitsin, fenobarbital, fenitoin) o‘z ichiga olgan preparatlar bilan birga qo‘llash budesonid metabolizmining oshishiga va uning tizimli konsentratsiyasining kamayishiga olib kelishi mumkin. Metandrostenolon, estrogenlar budesonid ta’sirini kuchaytiradi. 

 

Homiladorlik

Ushbu toifadagi bemorlarda dori vositasini qo'llash faqat onaga terapiyaning kutilayotgan foydasi bola yoki emizikli bola uchun potentsial xavfdan oshganda mumkin.

Pediatriyada qo'llash

Dori vositasini 6 yoshgacha bo'lgan bolalarga tavsiya etilmaydi.

Avtomobil boshqarish qobiliyatiga va mexanizmlarni boshqarishga ta'siri

Budekton dori vositasining avtomobil boshqarish va/yoki boshqa mexanizmlarni boshqarish qobiliyatiga ta'siri haqida ma'lumotlar mavjud emas.