Nurofen® bosh og‘rig‘i, migren, tish og‘rig‘i, og‘riqli hayz ko‘rish, nevralgiya, orqa og‘rig‘i, mushak og‘rig‘i, revmatik og‘riq va bo‘g‘imlardagi og‘riqlarda; shuningdek, gripp va shamollash kasalliklarida isitma holatida qo‘llaniladi. 

 Quyidagi dori vositalari bilan ibuprofenni bir vaqtda qo‘llashdan saqlanish kerak • Asetilsalisil kislotasi, shifokor tomonidan buyurilgan past dozalardagi asetilsalisil kislotasi (kuniga 75 mg dan ko‘p bo‘lmagan) bundan mustasno, chunki birga qo‘llash nojo‘ya ta’sirlar xavfini oshirishi mumkin. Bir vaqtda qo‘llanganda ibuprofen asetilsalisil kislotasining yallig‘lanishga qarshi va antiagregant ta’sirini kamaytiradi (antiagregant vosita sifatida kichik dozalarda asetilsalisil kislotasi qabul qilayotgan bemorlarda ibuprofen qabul qilish boshlanganidan so‘ng o‘tkir koronar yetishmovchilik rivojlanishining tez-tezligi oshishi mumkin). • Boshqa YOKV, xususan, selektiv TsOG-2 ingibitorlari – YOKV guruhiga kiruvchi ikki va undan ortiq preparatlarni bir vaqtda qo‘llashdan saqlanish kerak, chunki nojo‘ya ta’sirlar xavfi oshishi mumkin. Quyidagi dori vositalari bilan birga ehtiyotkorlik bilan qo‘llash • Antikoagulyantlar va trombolitik preparatlar – YOKV antikoagulyantlar, xususan, varfarin va trombolitik preparatlarning ta’sirini kuchaytirishi mumkin. • Antigipertenziv vositalar (APF ingibitorlari va angiotenzin II antagonistlari) va diuretiklar – YOKV ushbu guruh preparatlarining samaradorligini kamaytirishi mumkin. Buyrak funksiyasi buzilgan ayrim bemorlarda (masalan, suvsizlanish yoki buyrak funksiyasi buzilgan keksalarda) APF ingibitorlari yoki angiotenzin II antagonistlari va tsiklooksigenazani ingibitsiya qiluvchi vositalarni birga buyurish buyrak funksiyasining yomonlashuviga, shu jumladan o‘tkir buyrak yetishmovchiligi rivojlanishiga (odatda qaytar) olib kelishi mumkin. Ushbu o‘zaro ta’sirlarni koksiblarni APF ingibitorlari yoki angiotenzin II antagonistlari bilan birga qabul qilayotgan bemorlarda hisobga olish kerak. Shu sababli yuqorida ko‘rsatilgan vositalarni birga qo‘llashda ehtiyotkorlik bilan buyurish kerak, ayniqsa keksalarda. Bemorlarni suvsizlanishdan saqlash, shuningdek, bunday kombinatsiyalangan davolash boshlanganidan so‘ng va keyinchalik vaqti-vaqti bilan buyrak funksiyasini monitoring qilish imkoniyatini ko‘rib chiqish kerak. Diuretiklar va APF ingibitorlari YOKVning nefrotoksikligini oshirishi mumkin. • Glyukokortikosteroidlar – me’da-ichak yaralari va me’da-ichak qon ketishi xavfi oshadi. • Antiagregantlar va selektiv serotonin qayta qabul qilinishining ingibitorlari – me’da-ichak qon ketishi xavfi oshadi. • Yurak glikozidlari – YOKV va yurak glikozidlarini birga buyurish yurak yetishmovchiligi kuchayishiga, glomerulyar filtrlatsiya tezligining pasayishiga va yurak glikozidlarining plazmadagi konsentratsiyasining oshishiga olib kelishi mumkin. • Litiy preparatlari – YOKV qabul qilish fonida litiy plazmadagi konsentratsiyasining oshishi ehtimoli borligi haqida ma’lumotlar mavjud. • Metotreksat – YOKV qabul qilish fonida metotreksat plazmadagi konsentratsiyasining oshishi ehtimoli borligi haqida ma’lumotlar mavjud. • Siklosporin – YOKV va siklosporinni birga buyurishda nefrotoksiklik xavfi oshadi. • Mifepriston – YOKV qabul qilishni mifepriston qabul qilingandan keyin 8-12 kundan oldin boshlash mumkin emas, chunki YOKV mifepriston samaradorligini kamaytirishi mumkin. • Takrolimus – YOKV va takrolimusni birga buyurishda nefrotoksiklik xavfi oshishi mumkin. • Zidovudin – YOKV va zidovudinni birga qo‘llash gematotoksiklikni oshirishi mumkin. Gemofiliya bilan kasallangan OIV-pozitiv bemorlarda zidovudin va ibuprofen bilan birga davolashda gemartroz va gematoma rivojlanish xavfi oshganligi haqida ma’lumotlar mavjud. • Xinolon qatori antibiotiklari – YOKV va xinolon qatori antibiotiklari bilan birga davolash olgan bemorlarda tutqanoq rivojlanish xavfi oshishi mumkin. • Mielotoksik preparatlar – gematotoksiklik kuchayadi. • Tsefamandol, tsefoperazon, tsefotetan, valproevaya kislota, plikamitsin – gipoprothrombinemiya rivojlanish tez-tezligi oshadi. • Kanalchalar sekretsiyasini bloklovchi dori vositalari – ibuprofenning chiqarilishi kamayadi va plazmadagi konsentratsiyasi oshadi. • Mikrosomal oksidlanish induktorlari (fenitoin, etanol, barbituratlar, rifampitsin, fenilbutazon, tritsiklik antidepressantlar) – gidroksillangan faol metabolitlar ishlab chiqarilishi oshadi, og‘ir intoksikatsiyalar rivojlanish xavfi oshadi. • Mikrosomal oksidlanish ingibitorlari – gepatotoksik ta’sir xavfi kamayadi. • Og‘iz orqali qabul qilinadigan gipoglikemik dori vositalari va insulin, sulfonilmochevina hosilalari – preparatlarning ta’siri kuchayadi. • Antatsidlar va kolestiramin – so‘rilish kamayadi. • Urikozurik preparatlar – preparatlarning samaradorligi kamayadi. • Kofein – analgezik ta’sir kuchayadi. 

 Preparatni maksimal darajada qisqa kursda va simptomlarni bartaraf etish uchun zarur bo‘lgan minimal samarali dozada qabul qilish tavsiya etiladi. Agar preparatni 10 kundan ortiq qabul qilish zarur bo‘lsa, shifokorga murojaat qilish kerak. Bronxial astma yoki allergik kasallikning zo‘rayish bosqichida bo‘lgan bemorlarda, shuningdek, bronxial astma/allergik kasallik tarixi bo‘lgan bemorlarda preparat bronxospazmni keltirib chiqarishi mumkin. Tizimli qizil yuguruk yoki birikma to‘qima aralash kasalligi bo‘lgan bemorlarda preparatni qo‘llash aseptik meningit rivojlanish xavfini oshiradi. Uzoq muddatli davolashda periferik qon manzarasi va jigar hamda buyraklarning funksional holatini nazorat qilish zarur. Gastropatiya simptomlari paydo bo‘lsa, diqqatli nazorat, shu jumladan ezofagogastroduodenoskopiya, umumiy qon tahlili (gemoglobin aniqlash), najasda yashirin qon tahlili o‘tkazish ko‘rsatiladi. 17-ketosteroidlarni aniqlash zarur bo‘lsa, preparatni tadqiqotdan 48 soat oldin bekor qilish kerak. Davolash davrida etanol qabul qilish tavsiya etilmaydi. Buyrak yetishmovchiligi bo‘lgan bemorlar preparatni qo‘llashdan oldin shifokor bilan maslahatlashishlari kerak, chunki buyraklarning funksional holati yomonlashish xavfi mavjud. Gipertoniya, shu jumladan anamnezda va/yoki surunkali yurak yetishmovchiligi bo‘lgan bemorlar preparatni qo‘llashdan oldin shifokor bilan maslahatlashishlari kerak, chunki preparat suyuqlik tutilishi, arterial bosim oshishi va shishlarni keltirib chiqarishi mumkin. Homiladorlikni rejalashtirayotgan ayollar uchun ma’lumot: preparat siklooksigenazani va prostaglandinlar sintezini bostiradi, ovulyatsiyaga ta’sir qiladi, ayollarning reproduktiv funksiyasini buzadi (davolash to‘xtatilgandan so‘ng qaytar). 
 

. Ibuprofen qabul qilganda bosh aylanishi, uyquchanlik, sekinlashish yoki ko‘rish buzilishi kuzatilgan bemorlar avtotransport vositalarini haydash yoki mexanizmlarni boshqarishdan saqlanishlari kerak. Preparat amal qilish muddati tugaganidan keyin qo‘llanmasligi va bolalar uchun yaroqsiz joyda saqlanishi kerak. Preparatni homiladorlikning III trimestrida qo‘llash mumkin emas. I-II trimestrlarda preparatni qo‘llashdan saqlanish kerak, zaruriyat tug‘ilganda shifokor bilan maslahatlashish lozim. Ma’lumotlarga ko‘ra, ibuprofen oz miqdorda ona sutiga o‘tishi mumkin, bu esa emizikli bolaga salbiy ta’sir ko‘rsatmaydi, shuning uchun qisqa muddatli qabulda emizishni to‘xtatish zarurati odatda bo‘lmaydi. Preparatni uzoq muddatli qo‘llash zarur bo‘lsa, preparatni qo‘llash davrida emizishni to‘xtatish masalasini hal qilish uchun shifokorga murojaat qilish kerak. 

 Bolalarda dozani oshirib yuborish simptomlari tana vazniga nisbatan 400 mg/kg dan ortiq doza qabul qilingandan so‘ng paydo bo‘lishi mumkin. Kattalarda dozaga bog‘liq dozani oshirib yuborish effekti kamroq ifodalangan. Preparatning yarim chiqarilish davri dozani oshirib yuborishda 1,5-3 soatni tashkil etadi. Simptomlari: ko‘ngil aynishi, qusish, epigastral sohada og‘riq yoki kamroq hollarda diareya, quloqda shovqin, bosh og‘rig‘i va me’da-ichak qon ketishi. Og‘irroq hollarda markaziy asab tizimi tomonidan namoyon bo‘lishlar: uyquchanlik, kamdan-kam hollarda – qo‘zg‘aluvchanlik, tutqanoq, dezorientatsiya, koma. Og‘ir zaharlanish holatlarida metabolik atsidoz va protrombin vaqtining uzayishi, buyrak yetishmovchiligi, jigar to‘qimalarining shikastlanishi, arterial bosimning pasayishi, nafas olishning susayishi va sianoz rivojlanishi mumkin. Bronxial astmasi bo‘lgan bemorlarda ushbu kasallikning kuchayishi mumkin. Davolash simptomatik, nafas yo‘llarining o‘tkazuvchanligini ta’minlash majburiy, EKG va asosiy hayotiy ko‘rsatkichlarni monitoring qilish bemorning holati normallashguncha davom ettiriladi. Potensial toksik dozadagi ibuprofen qabul qilingandan so‘ng 1 soat ichida og‘iz orqali faollashtirilgan ko‘mir yoki me’dani yuvish tavsiya etiladi. Agar ibuprofen allaqachon so‘rilgan bo‘lsa, buyraklar orqali ibuprofenning kislotali hosilasini chiqarish uchun ishqoriy ichimlik buyurilishi, majburiy diurez o‘tkazilishi mumkin. Tez-tez yoki uzoq davom etuvchi tutqanoqlarni vena ichiga diazepam yoki lorazepam yuborish orqali to‘xtatish kerak. Bronxial astma kuchayganda bronxodilatatorlar qo‘llanilishi tavsiya etiladi.