Faol komponent: benzidamin gidroxlorid - 45 mg; Yordamchi komponentlar: glitserol - 1,5 g, etanol - 3,0 g, natriy saxarinat - 15 mg, yalpiz aromatizatori - 15 mg, suv - 15 ml gacha.

Og‘iz bo‘shlig‘i va LOR-organlarining yallig‘lanish kasalliklarida og‘riq sindromini simptomatik davolash (turli etiologiyali): - gingivit, glossit, stomatit (shu jumladan, nurlanish va kimyoviy terapiyadan keyin); - faringit, laringit, tonzillit; - og‘iz bo‘shlig‘i shilliq qavatining kandidozi (kombinatsiyalangan terapiya tarkibida); - so‘lak bezlarining kalkulez yallig‘lanishi; - operatsiyalardan va jarohatlardan keyin (tonzillektomiya, jag‘ sinishlari) - tishlarni davolash va olib tashlashdan keyin; - parodontoz. Infeksion va yallig‘lanish kasalliklarida, tizimli davolash talab etilsa, kombinatsiyalangan terapiya tarkibida qo‘llash zarur.

Benzidaminga yoki preparatning boshqa komponentlariga yuqori sezuvchanlik, 3 yoshgacha bo‘lgan bolalar (0,15% mahalliy qo‘llash uchun sprey uchun) yoki 18 yoshgacha bo‘lgan bolalar (0,30% mahalliy qo‘llash uchun sprey uchun).

Kattalarga 2-4 purkash 2-6 marta kuniga. Davolash davomiyligi 7 kundan oshmasligi kerak. Tavsiya etilgan davolash muddati tugagandan so‘ng yaxshilanish bo‘lmasa yoki yangi simptomlar paydo bo‘lsa, shifokorga murojaat qilish zarur. Preparatni faqat qo‘llanma ko‘rsatmalariga muvofiq va unda ko‘rsatilgan dozalarda qo‘llang. Zarurat tug‘ilganda, dori vositasini qo‘llashdan oldin shifokor bilan maslahatlashing.

Jahon sog‘liqni saqlash tashkiloti (JSST) tomonidan nojo‘ya ta’sirlar rivojlanish tez-tezligi tasnifi: juda tez-tez - ≥ 1/10; tez-tez - ≥ 1/100 dan < 1/10 gacha; kamdan-kam - ≥ 1/1000 dan < 1/100 gacha; kam - ≥ 1/10000 dan < 1/1000 gacha; juda kam - < 1/10000; tez-tezligi noma’lum - mavjud ma’lumotlar asosida baholab bo‘lmaydi. Mahalliy reaksiyalar: kam - og‘iz bo‘shlig‘ida qurish, kuydiruvchi hissi; tez-tezligi noma’lum - og‘iz bo‘shlig‘ida uvishish hissi. Allergik reaksiyalar: kamdan-kam - fotosensibilizatsiya; kam - gipersensitivlik reaksiyalari, teri toshmasi, teri qichishishi; juda kam - angionevrotik shish, laringospazm; tez-tezligi noma’lum - anafilaktik reaksiyalar. Agar ko‘rsatmada keltirilgan nojo‘ya ta’sirlar kuchaysa yoki ko‘rsatmada qayd etilmagan boshqa nojo‘ya ta’sirlar paydo bo‘lsa, bu haqda darhol shifokorga xabar berish kerak.

Benzidamin nosteroid yallig‘lanishga qarshi preparat bo‘lib, indazol guruhiga mansub. Yallig‘lanishga qarshi va mahalliy og‘riq qoldiruvchi ta’sir ko‘rsatadi, mikroorganizmlarning keng spektriga qarshi antiseptik ta’sirga ega. Preparatning ta’sir mexanizmi hujayra membranalarini barqarorlashtirish va prostaglandinlar sintezini ingibitsiyalash bilan bog‘liq. Benzidamin tezda mikroorganizmlar membranalari orqali kirib borishi natijasida hujayra tuzilmalariga zarar yetkazish, metabolik jarayonlarni va hujayra lizosomasini buzish orqali antibakterial va aniq antimikrob ta’sir ko‘rsatadi. Candida albicans ga nisbatan zamburug‘larga qarshi ta’sirga ega. Zamburug‘larning hujayra devori va ularning metabolik zanjirlarida tuzilmaviy o‘zgarishlar yuzaga keltiradi, natijada ularning ko‘payishiga to‘sqinlik qiladi, bu esa benzidaminni og‘iz bo‘shlig‘idagi yallig‘lanish jarayonlarida, shu jumladan infeksion etiologiyada qo‘llash uchun asos bo‘ldi. Farmakokinetikasi: Mahalliy qo‘llanganda preparat shilliq qavatlar orqali yaxshi so‘riladi va yallig‘langan to‘qimalarga kiradi, qon plazmasida tizimli ta’sir ko‘rsatish uchun yetarli bo‘lmagan miqdorda aniqlanadi. Preparat asosan buyraklar orqali, nofaol metabolitlar yoki kon’yugatsiya mahsulotlari ko‘rinishida chiqariladi.

Preparatni qo‘llashda gipersensitivlik reaksiyalari rivojlanishi mumkin. Bunday holda davolashni to‘xtatish va mos terapiya tayinlash uchun shifokorga murojaat qilish tavsiya etiladi. Og‘iz-halqum shilliq qavatining yara bilan zararlanishi jiddiyroq patologiya mavjudligidan dalolat berishi mumkin. Agar simptomlar 3 kundan ortiq davom etsa, shifokorga murojaat qilish zarur. Preparatni asetilsalitsil kislotasi yoki boshqa nosteroid yallig‘lanishga qarshi preparatlarga yuqori sezuvchanligi bo‘lgan bemorlarda qo‘llash tavsiya etilmaydi. Preparat bronxial astma anamneziga ega bemorlarda ehtiyotkorlik bilan qo‘llanilishi kerak, chunki preparatni qo‘llash fonida ularda bronxospazm rivojlanishi mumkin. Zvezdochka LOR preparati past darajada etanol saqlaydi. Bir martalik dozada 100 mg dan kam etanol saqlaydi.

Hozirgi vaqtda benzidamin bilan dozani oshirib yuborish holatlari haqida xabar berilmagan. Preparatni qo'llash bo'yicha yo'riqnomaga muvofiq qo'llanganda dozani oshirib yuborish ehtimoli kam. Preparat tasodifiy yutib yuborilganda quyidagi simptomlar paydo bo'lishi mumkin: qusish, qorin sohasida spazmlar, bezovtalik, qo'rquv, gallyutsinatsiyalar, tutqanoq, ataksiya, isitma, taxikardiya, nafas olishning susayishi. Antidot noma'lum. Dozani oshirib yuborishda me'dani yuvish, simptomatik davolash tavsiya etiladi.