Bitta tabletkada
faol modda – metronidazol 250 mg;
yordamchi moddalari makkajo‘xori kraxmali, stearin kislotasi, povidon, mikrokristallik sellyuloza.

Sintetik antimikrob va antiprototoz vosita, nitroimidazol guruhiga mansub. Preparat bakteritsid ta’sir ko‘rsatadi.
Ta’sir mexanizmi mikroorganizmlar hujayralarida 5-nitrogruppaning anaerob mikroorganizmlarning transport oqsili – ferredoksinreduktaza ta’sirida yuqori reaktiv 5-nitroksigrupaga qaytarilishi bilan bog‘liq, bu esa mikroorganizmlar hujayrasining DNKsiga ta’sir qilib, ularning nuklein kislotalari sintezini buzadi va ularning o‘limiga olib keladi.
Grammanfiy anaerob bakteriyalarga nisbatan faol, jumladan Bacteroides spp. guruhi: B. fragilis, B. caccae, B. uniformis, B. distasonis, B. ovatus, B. thetaiotaomicron, B. vulgatus; Fusobacterium spp.: F. nucleatum, F. necrophorum; Veilonella spp., Prevotella spp.: P. bivia, P. buccae, P. disiens; Porphyromonas spp.; gramijobiy anaerob sporali tayoqchalar – Clostridium spp. (shu jumladan C. difficile), Eubacterium spp.; gramijobiy anaerob kokklar Peptococcus spp., Peptostreptococcus spp.
Quyidagi protozoalarga nisbatan faol: Trichomonas vaginalis, Entamoeba histolytica, Giardia lamblia. Antibiotiklar bilan birga Helicobacter spp. (shu jumladan H. pylori) va Gardnerella vaginalis ga nisbatan faol.
Metronidazolga fakultativ anaeroblar, aerob gramijobiy va grammanfiy bakteriyalar, malyariya plazmodiylari, patogen zamburug‘lar va viruslar chidamli.
Metronidazol o‘smalarning ionlashtiruvchi nurlanishga sezuvchanligini oshiradi, alkogolga sezgirlikni kuchaytiradi (disulfiramga o‘xshash ta’sir), reparativ jarayonlarni rag‘batlantiradi.

Metronidazol buyurishda bosh miya jarohati, asab tizimi kasalliklari tarixi bo‘lgan shaxslar, shuningdek, jigar funksiyasi buzilgan bemorlarda ehtiyotkorlik bilan qo‘llash lozim. Metronidazol qabul qilish davrida spirtli ichimliklar va spirt saqlovchi dori vositalarini iste’mol qilish mumkin emas, chunki disulfiramga o‘xshash reaksiyalar (qorin sohasida spazmatik og‘riqlar, ko‘ngil aynishi, qusish, bosh og‘rig‘i, yuzga to‘satdan qon quyilishi) rivojlanishi mumkin. Uzoq muddat qo‘llanganda periferik qon manzarasini (leykotsitlar darajasi) vaqti-vaqti bilan nazorat qilish kerak. Metronidazol bilan davolash vaqtida leykopeniya, ataksiya va boshqa har qanday nevrologik holat buzilishi paydo bo‘lsa, preparatni darhol to‘xtatish ko‘rsatkichi hisoblanadi.
Jinsiy yo‘l bilan yuqadigan infeksiyalarda qo‘llash. Davolash davomida jinsiy aloqadan butunlay tiyilish kerak. Har ikki jinsiy hamkorni bir vaqtda davolash majburiydir. Hayz ko‘rish davrida davolash to‘xtatilmaydi. Davolash tugagandan so‘ng 2-3 hayz sikli davomida qayta laborator tekshiruvlar o‘tkazish lozim.
Laborator ko‘rsatkichlarga ta’siri. Metronidazol treponemalarni harakatsizlantiradi va TPI-testi (Nelson testi)da soxta musbat natijalar paydo bo‘lishiga olib kelishi mumkin. Metronidazol bilan davolash fonida jigar transaminazlari faolligi, LDG, triglitseridlar va qonda glyukoza darajasini aniqlashda soxta natijalar olinishi mumkin.
Dori vositasining transport vositasini boshqarish yoki potensial xavfli mexanizmlarni boshqarish qobiliyatiga ta’siri xususiyatlari
Metronidazol qabul qilishda bosh aylanishi rivojlanishi mumkinligi sababli, davolash davomida avtotransport vositasini boshqarish va har qanday potensial xavfli faoliyat bilan shug‘ullanishdan tiyilish lozim.