Preparat pankreatin hisobiga me’da osti bezining tashqi sekretsiya yetishmovchiligini va o‘t komponenti hisobiga jigar o‘t ajratish funksiyasining yetishmovchiligini kompensatsiya qiladi. Festal proteolitik, amilolitik va lipolitik ta’sir ko‘rsatadi. Pankreatin tarkibiga kiruvchi fermentlar: amilaza, lipaza va proteaza uglevodlar, yog‘lar va oqsillarni hazm qilishni osonlashtiradi, bu ularning ingichka ichakda to‘liqroq so‘rilishiga yordam beradi. Shu jihatdan Festal boshqa ferment preparatlaridan deyarli farq qilmaydi. Festal tarkibidagi o‘t kislotalari preparatga surunkali pankreatitga ko‘pincha hamroh bo‘ladigan biliar yetishmovchilikni tuzatish uchun qo‘shimcha imkoniyatlar beradi. O‘t ekstrakti o‘t haydovchi ta’sir ko‘rsatadi, yog‘lar va yog‘da eriydigan A, E va K vitaminlarining so‘rilishini osonlashtiradi, me’da osti bezi tomonidan lipaza ajralishini rag‘batlantiradi. Gemitsellyulaza fermenti o‘simlik tolalarini parchalashga yordam beradi, bu ham hazm jarayonlarini yaxshilaydi, ichakda gaz hosil bo‘lishini kamaytiradi. 

 Festal bilan bir vaqtda qo‘llanganda PASQ (p-aminosalisil kislotasi), sulfanilamidlar, antibiotiklarning so‘rilishi kuchayadi; temir preparatlari so‘rilishining kamayishi mumkin. Kalsiy karbonat va/yoki magniy gidroksid saqlovchi antatsid vositalarni bir vaqtda qo‘llash Festal samaradorligining kamayishiga olib kelishi mumkin. Simetidin preparatning ta’sirini kuchaytiradi.