Kombinatsiyalangan preparat, uning ta'siri tarkibiga kiruvchi yog'da eriydigan A va E vitaminlarining xossalari bilan belgilanadi. Retinol (A vitamini) - epiteliy bo'linishi va differensirovkasini tartibga solish uchun zarur, teri epiteliy hujayralarining bo'linishini kuchaytiradi, hujayra populyatsiyasini yoshartiradi, keratinizatsiya jarayonlarini sekinlashtiradi, turli biokimyoviy jarayonlarda kofaktor sifatida ishtirok etadi. Alfa-tokoferol (E vitamini) - antioksidant xossalarga ega, erkin radikal reaksiyalarning rivojlanishini sekinlashtiradi, hujayra membranalarini shikastlovchi peroksidlarning hosil bo'lishini oldini oladi, bu organizm rivojlanishi, asab va mushak tizimlarining normal funksiyasi uchun muhim ahamiyatga ega. Ba'zi ferment tizimlarining kofaktori hisoblanadi. Kapillyar va to'qima o'tkazuvchanligini normallashtiradi, to'qimalarning gipoksiyaga chidamliligini oshiradi.

Retinol palmitat ingichka ichakning yuqori bo'limlarida yaxshi so'riladi, limfa yo'llariga o'tadi va jigarga tushadi. Kiritilgandan so'ng plazmadagi maksimal konsentratsiyaga 4 soatdan keyin erishiladi. Retinol organizmda notekis taqsimlanadi. Uning eng ko'p miqdori jigar va to'r pardada, shuningdek, buyraklar, buyrak usti bezlari va boshqa ichki sekretsiya bezlarida aniqlanadi. Retinol almashinuvi mahsulotlari buyraklar orqali chiqariladi. Yarim chiqarilish davri 9,1 soat. Alfa-tokoferol asetat me'da-ichak traktida so'riladi, uning katta qismi limfaga tushadi, barcha to'qimalarda tez taqsimlanadi, safro bilan va metabolitlar ko'rinishida siydik bilan chiqariladi. 

Vitamin A giperkaltsemiya rivojlanish xavfini oshiradi. Kolestiramin, kolestipol, mineral moylar, neomitsin vitamin A va E ning so‘rilishini kamaytiradi (ularning dozasini oshirish talab qilinishi mumkin). Peroral kontratseptivlar plazmadagi vitamin A konsentratsiyasini oshiradi. Izotretinoin vitamin A bilan intoksikatsiya rivojlanish xavfini oshiradi. Tetratsiklin va vitamin A ni yuqori dozalarda (50 ming YE va undan yuqori) bir vaqtda qo‘llash intrakranial gipertenziya rivojlanish xavfini oshiradi. Vitamin E glyukokortikosteroid preparatlar, nosteroid yallig‘lanishga qarshi preparatlar, antioksidantlar ta’sirini kuchaytiradi, vitamin A, D, yurak glikozidlarining samaradorligini oshiradi va toksikligini kamaytiradi.

A va E vitaminlari gipervitaminozi rivojlanishining oldini olish uchun tavsiya etilgan dozalardan oshmaslik kerak. Preparatni qo‘llashda uning tarkibida vitamin A (100 ming ME) yuqori miqdorda ekanligini, shuningdek, u davolash uchun mo‘ljallangan, profilaktik dori vositasi emasligini hisobga olish lozim. Selen va oltingugurt tutuvchi aminokislotalarga boy dieta vitamin E ga bo‘lgan ehtiyojni kamaytiradi. Preparatni yaroqlilik muddati tugagandan so‘ng qo‘llash mumkin emas va uni bolalar uchun yetib bo‘lmaydigan joyda saqlash kerak.

Transport vositalari va mexanizmlarni boshqarish qobiliyatiga ta’siri

Preparat avtomobil va potentsial xavfli mexanizmlarni boshqarish qobiliyatiga ta’sir qilmaydi.

A vitaminining o‘tkir dozani oshirib yuborish simptomlari (kiritilgandan 6 soat o‘tib rivojlanadi) kattalarda - uyquchanlik, sustlik, diplopiya, bosh aylanishi, kuchli bosh og‘rig‘i, ko‘ngil aynishi, og‘ir qusish, diareya, asabiylashish, osteoporoz, milkdan qon ketishi, og‘iz bo‘shlig‘i shilliq qavatining qurishi va yara hosil bo‘lishi, lablar, terining (ayniqsa kaftlarda) quruqligi va qobiq bo‘lishi, qo‘zg‘aluvchanlik, ongning chalkashishi. A vitaminining surunkali intoksikatsiyasi simptomlari - anoreksiya, suyaklarda og‘riq, teri va lablarda yoriqlar va quruqlik, og‘iz bo‘shlig‘i shilliq qavatining qurishi, gastralgiya, qusish, gipertermiya, asteniya, bosh og‘rig‘i, fotosensibilizatsiya, pollakiuriya, nikturiya, poliuriya, asabiylashish, soch to‘kilishi, tovon, kaft, burun-lab uchburchagi sohasida sariq-to‘q sariq dog‘lar, gepatotoksik holatlar, ko‘z ichki bosimining oshishi, oligomenoreya, portal gipertenziya, gemolitik anemiya, suyaklarning rentgenogrammasida o‘zgarishlar, tutqanoq. E vitaminining dozani oshirib yuborish simptomlari uzoq muddat davomida 400-800 YE/kun dozada qabul qilinganda - ko‘rishning noaniqligi, bosh aylanishi, bosh og‘rig‘i, ko‘ngil aynishi, diareya, gastralgiya, asteniya; 800 YE/kun dan ortiq dozada uzoq muddat davomida qabul qilinganda - K vitamini yetishmovchiligi bo‘lgan bemorlarda qon ketish xavfining oshishi, tireoid gormonlar metabolizmining buzilishi, jinsiy funksiyaning buzilishi, tromboflebit, tromboemboliya, nekrotik kolit, sepsis, gepatomegaliya, giperbilirubinemiya, buyrak yetishmovchiligi, ko‘z to‘r pardasiga qon quyilishi, gemorragik insult, assit. Davolash - preparatni bekor qilish, simptomatik terapiya.